Öber mii

Da bin ii. Am liebste hanis ganz efach ond Bodeständig, för mii bedütet da wohrhaftig ond echt se.
Wen ii mii selber mösst beschriibe wöri säge ii bii sehr offe, loo mii unendlich gern ii tüüfi Gspröch verwickle ond lieb sAbentüür ond dFreiheit. Ii de Inspirierende Gschichte vo Mensche chönti mii verlüüre ond ii bi begeisterigsfähig för alls möglichs.
Mit frohem Muet, amne offne grosse Herz ond ganz viel freud got mer efach soviel ringer dör sLebe.
Osserdem schätzi sehr sefach Lebe. Dasmer nüd immer alls moss ha ond sich nüd vo dere schnelle Welt immer loot lo mitriise.
Efach sich selber chöne seh, freud aa de chline Sache ha ond mit viel dankbarkeit de ääge Weg go.

Im Dezember 1999 bini of dWelt cho. Mit föf Gschwöschterte bini als zweit jüngsti ofem Buurehof z‘Urnäsch AR ufgwachse. Mini Eltere füehred mitendand s‘Hofstöbli womer Gruppe we Hochziite, Geburtstäg oder Firmealäss bewirted. Somit hemmer ee schöni Kombination os Landwirtschaft ond Gastronomie chöne of Bää stelle.
De Charly, min junge Appezellerbläss, isch au immer mit debi ond so min treue Begleiter.

Fleischfachfrau Veredelig isch min erlernte Bruef. Noch de Lehr hets mii jedoch schnell id Berge zoge ond mittlerwile hani scho de vierti Alpsommer hender mer. Dei bini jewils aagstellt zom Hirte ond Melche.
Momentan bsuechi Vollziit dBüürinneschuel im Inforama Hondrich zBern.

Fotografiere hani mer viel dör "learning by doing" selber biibrocht... jedoch hani of ee grossi Onderstötzig vo de liebe Nina Kälin dörfe zelle.
Dör ehri Kürs, ehres Coaching ond vorallem dör ehri äämolig ond inspirierend Art, hani ere de Schopf ii dii richtig Bahn z‘verdanke.
Mitlerwile hani en huffe lehrrichi Kürs bi ere im Oberiberg dörfe bsueche.
Au vo anderne Fotografe hani scho bi diverse Workshops ond Kürs dörfe profitiere.

Mini Wert

Dankbarkeit

Ii bi dere Mänig das mer mengmoll inere viel z‘schnelle Welt lebet, die chline Sache öbersiet mer liecht ond sie hend meischtens ken grosse Wert mee.
Den föndis wichtig wemer sich zwüschet döre emoll Ziit nennt zom om sich luege ond wohrnee wie guet dasmers het ond wie fescht dasmer dörf dankbar see för alls woo isch.

Weltoffeheit

"Lasst uns ein Abenteuer erleben!" ii liebs wen da näbert zo mer sät! Immerwider neus entdecke, neuii Lüüt kennelerne ond erlebe wies ii anderne Gegende lebed. Mii züchts Abentüür richtig aa ond ii bi immer parat zom "Pferde stehlen!"

Freiheit

Fotografie büütet mer unglaublich viel Freiheit, ii dörf da mache woni liebe, eso wies mer gfallt. Verosse ii de Natur noch aa de Berge dörfe kreativ se ond den no mit so herzliche Chonde.

Selbstverantwortig

Jede isch för sich selber verantwortlich, du bisch de Hoptdarsteller vo dinere ägne Gschicht. Wo du stoosch ond bisch hesch ganz ele du, ii dinere Hand.
Da isch doch ee wunderbars Gfühl ond säät änem, wemer will, isch efach alles möglich!
"Träume sind zum Jagen da!"

Bodeständigkeit

Am beschte gots mer weni mini Erdig ond feschte Bode onder de Füess gspüür. Tradition ond Bodeständigkeit liit mer fescht am Herze, es erfüllt mii ond holt mii wider zo mine Worzle weni widermoll zfescht will abhebe.